Hamiləlik zamanı infeksiyaların yoxlanılmasına (skrininq) aid müddəalar
Hepatit B, hepatit C, HİV (İİV), sifilis, toksoplazmoz, sitomeqalovirus və məxmərək kimi infeksion xəstəliklərin skrininqi və ya profilaktik yoxlanışı antenatal qulluğun vacib məsələlərindən biridir.
1. Hamiləlik zamanı infeksiyaların yoxlanılmasına (skrininq) aid müddəalar.
• Bütün hamilələrə Səhiyyə Nazirliyinin təsdiq etdiyi qaydalara əsasən skrininqdən keçmək həkim tərəfindən təklif olunmalıdır:
- Hamiləliyin əvvəlində və həmçinin lazım gəldikdə təkrarlanmalıdır
- Hamilə yoluxma riski olduğunu hesab etdikdə müalicə həkimi ilə məsləhətləşməli və həkimin göndərişi əsasında müvafiq müayinələrdən keçməlidir
• Anamnezində hepatit B, hepatit C, HİV(İİV), toksoplazmoz, sitomeqalovirus və sifilis xəstəliyi olan və ya hamiləlik dövründə ilk dəfə aşkar edilmiş hamilə qadınların dərinləşdirilmiş müayinə və müalicəsi, o cümlədən, profilaktik müalicəsi müvafiq mütəxəssislərin cəlb edilməsi ilə aparılmalıdır.
• Hepatit B virusu və məxmərəyə qarşı immuniteti olmayan (əvvəllər vaksin almamış və ya uşaqlıq zamanı vaksinasiya olunmuş lakin hazırda immuniteti zəif olan) qadınların hamiləlikdən əvvəl məxmərəyə qarşı peyvənd alması tövsiyə edilir.
• Hepatit B virusuna yoluxmuş və ya qan analizində hepatit B müsbət (+) olan analardan doğulmuş körpələr Səhiyyə Nazirliyinin təsdiq etdiyi standartlara uyğun peyvənd kursu almalı və müvafiq müalicə kursu keçməlidir.
• İlk dəfə infeksiyaların yoxlanılmasından imtina edən qadınlara müalicə həkimi tərəfindən hər antenatal müayinə zamanı təkrarlanan skrininq təklif olunmalıdır. Ümumiyyətlə, skrininqin hamiləliyin 28-ci həftəsinə qədər aparılması ən optimal hesab olunur.
Azərbaycanda qadınlar ilk dəfə hamiləliyin 12-ci həftəsinə qədər hepatit B, HİV (İİV), sifilis və məxmərəyə görə müayinə olunmalıdırlar; hepatit B və sifilisə təkrar müayinə hamiləliyin 34-36-cı həftələrində aparılmalıdır. Qadın və ya onun partnyorunda İİV-ə yoluxmanın risk faktorları olduğu zaman İİV-ə görə təkrar müayinənin bir aydan sonra keçirilməsi tövsiyə olunur. Hepatit C-yə yoxlanma antenatal dövrdə profilaktik müayinənin siyahısına daxil olmasa da, risk faktorları olduqda qadınların hepatit C-yə görə yoxlanması aparıla bilər.
Hamiləlik zamanı yoxlanılan infeksiyalar, skrininqin mahiyyəti və sonrakı nəzarət
2. Hamiləlik zamanı yoxlanılan infeksiyalar, skrininqin mahiyyəti və sonrakı nəzarət barədə məlumatlar
